Ekitea ez da lan erraza. Gero eta jende gehiago negozio bat martxan jartzera ausartzen den arren, abiatzeko behar den finantziazioa lortzea da pausorik zailenetako bat. Egia da, halaber, aldi berean handitu egin direla enpresa bat martxan jartzeko funtsak lortzeko bideak. Hemen du garrantzia funts motak ezagutzeak, proiektu bakoitzaren beharretara hobekien egokitzen den modua aukeratzeko.
Proiektu bat finantzatzeko funts motak
Gero eta funts mota gehiagorekin finantzatu ahal da proiektu bat, familiakoei eta lagunei dirua eskatzeaz gain, azken hau finantzaketa-modu azkarra izanik, bermerik behar ez duena, baina ekintzaileen irudia arriskuan jartzen duena proiektuak funtzionatzen ez badu. Hona hemen funts-mota ohikoenak.
Banku-mailegua
Enpresa-ekosistemaren barruan, aukera erraz eta erabilienetako bat da. Gehien erabiltzen dituzten produktuak, bai enpresa txikiek bai ertainek, merkataritzako kredituak, kreditu lerroak eta banku maileguak dira.
Diru-laguntzak eta laguntza publikoak
Administrazio publikoek hainbat dirulaguntza eta laguntza eskaintzen dituzte proiektuak finantzatzeko, batez ere berrikuntzarekin eta teknologiarekin zerikusia dutenak. Hauek eskuratzeko, laguntzaren arabera aldatzen diren baldintza batzuk bete behar dira.
Crowdfundingeko inbertsio-txanda
Crowdfundingak finantziazioa behar duten ekintzaileak proiektuaren aldeko apustua egin nahi duten inbertitzaileekin harremanetan jartzen ditu. Crowdfunding Bizkaia bezalako erakundeek elkarlaneko finantzaketa kolaboratibo mota hau eskaintzen dute beharrezko funtsak lortzeko orduan.
Lehiaketak eta bekak
Halaber, ohikoak dira hainbat erakundek antolatutako lehiaketa edo ekitaldiak, non aurkeztutako enpresa-proiektu onenak baloratzen diren. Saria laguntza ekonomikoak, aholkularitza profesionala edo sustapen kanpainak izan daitezke.
Business Angels-ak
Inbertitzaile pribatu hauek inbertsio-gaitasuna izateaz gain, enpresa-munduarekin lotutako ezagutzak dituzten pertsona fisikoak dira, eta hazteko ahalmen handia duten enpresa-proiektuen garapena bultzatzeko aukera ematen dute.
Arrisku-kapitaleko funtsak
Sozietate anonimo espezializatuek kudeatuta, beren baliabideak enpresetan inbertitzen dituzte mozkinak lortzeko, etorkizunean haien partaidetza salduz. Finantziazio-mota hau asko erabiltzen dute startup-ek eta hedatze-prozesuan dauden enpresa berritzaileek.
Startup-en inkubagailuak
Enpresa-munduak teknologian duen interesagatik sortuak, erakunde hauek startupei beren hasierako etapan laguntza ematen diete, negozio-eredua prestatzeko, bezeroak erakartzeko jarraitu beharreko estrategia zehazteko eta finantzaketa lortzeko.
Factoring-a
Aukera hau ETEei zuzenduta dago, eta kontratu bat sinatzean datza. Kontratu honen bidez, enpresa batek, deskontu zehatz batekin, bere kredituak eta fakturak etorkizunean kobratzeagatik jasoko lukeen dirua berehala eskuratzen du, kobrantza horiek kontratua sinatu duen enpresari eskualdatuz.
Bootstrapping-a
Termino hau sortzaileen aurrezki propioetan eta lortutako fakturazioaren bidezko finantzazioan datza. 2008ko krisi ekonomikoak modan jarri zuen finantziazio-mota honi esker ez zaude kanpoko eragileen mende, lortutako hazkundea enpresara itzuliz.
Bartering-a
Zuzeneko finantziazio-sistema bat ez den arren, enpresen arteko merkataritza-akordioen bidezko zerbitzu-truke honek beste behar batzuk finantzatzeko balioko duen aurrezkia sor dezake, nahiz eta tartean dauden enpresen artean mendekotasun-harremana sortu.
Enpresa-proiektuak finantzatzearen abantailak
Proiektu bat nola finantzatu jakitea oso garrantzitsua da, bai abian jartzeko, bai merkatuan bizirik irauteko. Enpresek finantziazio-iturri desberdinetara jotzen dute, bakoitzak bere abantailak dituelarik:
- Finantzaketa propioa edo barne-finantzaketa:
- Autonomia: inoren esku-hartzerik gabe.
- Berehalakotasuna: legezko tramiteen zain egon beharrik gabe.
- Askatasuna: enpresaren balioa hobetzen duen kaudimen ekonomikoa.
- Pasiboen segurtasuna eta estaldura: zorrekin edo ordainketekin atzeratzeagatiko kezkarik gabe.
- Berrinbertsioa eta mozkina: enpresan berrinbertitzeak abantaila fiskalak eta bestelako pizgarriak dakartza.
- Kanpo-finantzaketa:
- Kreditu-historia: banku-historia izateak norberaren baliabideak hobetzeko aukera ematen du eta ondare pertsonalaren gaineko arriskuak murrizten laguntzen du.
- Plangintza: kanpoko finantzaketak enpresaren erabilerak eta dirua erabiltzeko modua planifikatzera behartzen du, arriskuak eta ziurgabetasuna murriztuz.
- Ideien egiaztapena: kanpoko parte-hartzeari esker, ideiak partekatu ahal dira, eta enpresak balorazio hobea izango du, talde profesionalarekin eta irizpide zuzenak betetzen dituena.