Crowdfunding Bizkaiak 700.000 euro baino gehiago finantzatu ditu lehen bost crowdlending eragiketetan
140 inbertitzaile baino gehiagoren parte-hartzeari esker, plataformak 706.500 euro bideratu ditu Bizkaiko bost enpresatara, martxoan Crowdlending Bizkaia merkaturatu zenetik, lurraldeko enpresa-sarearentzako finantzaketa-eredu berri bat sendotuz.
Martxoaren 10ean Crowdlending Bizkaia aurkeztu zenetik, plataformak arrakastaz itxi ditu partaidetzazko finantzaketarako bost erronda, eta 706.500 euro mobilizatu ditu Bizkaian ESG inpaktua duten enpresa-proiektu berritzaileak sustatzeko.
Hauek dira orain arte finantzatutako enpresak:
- Ziur Water Services enpresak 50.000 euro eskuratu zituen 6 egunetan, 26 inbertitzaileren parte-hartzeari esker.
- RK Solutions-ek 200.000 euro jaso zituen 5 egunetan, 74 inbertitzaileren laguntzarekin.
- beXReal-ek 200.000 euroko erronda egin zuen egun bakar batean, 51 inbertitzaileren parte-hartzearekin.
- Alfa Deco Subconjuntos-ek ordubetean 150.000 euro lortu zituen 41 inbertitzaileri esker.
- Landatu Solar-ek 106.500 euroko finantziazioa lortu zuen ordubete baino gutxiagoan, 33 inbertitzaileren babesarekin.
Emaitza hauek erakusten dute partaidetzazko finantzazioak gero eta interes handiagoa duela enpresa-hazkundea sustatzeko tresna gisa, eta agerian uzten dute inbertsio-komunitateak konfiantza duela berrikuntzarako eta inpaktua sortzeko gaitasuna duten proiektuetan.
Gainera, eragiketa guztiek ELKARGIren bermea izan dute, eta, horri esker, inbertitzaileentzako arrisku-profil txikiko inbertsio-alternatiba bat eskaini ahal izan da.
Crowdfunding Bizkaiatik eskerrak eman nahi dizkiegu gure plataforma beren proiektuak finantzatzeko aukeratu duten enpresa guztietako zuzendaritza-taldeek emandako konfiantzagatik, bai eta gure komunitate inbertitzailearen konpromisoagatik ere. Izan ere, konpromiso horri esker, gero eta enpresa-ekimen gehiagok finantzaketa bide berri bat aurkitu dute.
Lehen balantze honen ondoren, plataformak irailean ekingo dio berriro inbertsio-aukera berriak argitaratzeari.
Partaidetzazko finantzaketa lortu nahi duten proiektu berritzaileak edo ESG inpaktu-proiektuak dituzten Bizkaiko enpresak harremanetan jar daitezke Crowdfunding Bizkaiarekin, hurrengo errondetan sartzea baloratzeko: crowdfundingbizkaia@bizkaia.eus
